Shkolla e Magjistraturës, më datë 30 maj 2024, zhvilloi aktivitetin trajnues me temë: “Arsyetimi dhe shkrimi i vendimeve gjyqësore: Modele të arsyetimit dhe shkrimit të vendimeve gjyqësore; skematika e ndërtimit të një vendimi, pjesët përbërëse të tij, lidhja ndërmjet tyre, renditja e argumenteve; veçoritë e vendimit të gjyqtarit të hetimeve paraprak, seancës paraprake dhe gjyqtarit të themelit në raport me kërkesat e palëve; refleksioni i arsyetimit specifik në pavarsinë e gjyaktës”.
Ky aktivitet u drejtua nga:
Ekspertë: Sokol Berberi, Sokol Pina, Dr. Arnd Weishaupt [gjyqtar gjerman (ekspert nga IRZ)]
Lehtësues: Olti Skrame, Sabrina Ahmed
Qëllimi i këtij trajnimi ishte: Diskutimi dhe analizimi i arsyetimit të vendimeve gjyqësore si pjesë e procesit të rregullt ligjor, i cili përbën njëkohësisht një detyrim për organet gjyqësore, si dhe një të drejtë për çdo individ. Si pjesë e procesit të rregullt ligjor, detyrimi i arsyetimit të vendimeve gjyqësore i nënshtrohet kontrollit kushtetues lidhur me plotësimin e tij nga ana e gjykatave. Arsyetimi i vendimeve gjyqësore është trajtuar si në aspektin e procesit të rregullt ligjor, ashtu edhe si një prej elementëve në përmbajtje të vendimit gjyqësor.
Gjatë këtij aktiviteti u trajtuan tema të ndryshme, si:
- Prezantimi dhe njohja me objektivat e trajnimit: kuize për të nxitur ndërveprimin dhe marrë informacion.
- Struktura e arsyetimit të vendimeve gjyqësore në gjykatat e faktit, sipas standardit logjik dhe bindës: elementët, radha e argumenteve, paragrafët dhe gjuha.
- Cilësia e arsyetimit të vendimeve gjyqësore të shkallës së parë dhe standardet e kontrollit nga gjykata e apelit: arsyetimi dhe shkrimi i vendimeve gjyqësore të apelit: problematika dhe praktikat të mira.
- Standardet e arsyetimit dhe shkrimit të vendimeve gjyqësore në gjykatat e faktit në Gjermani: struktura, elementët, argumentimi.
- Veçoritë e vendimit të gjyqtarit të hetimeve paraprake, seancës paraprake dhe gjyqtarit të themelit në shkallën e parë: problematika dhe praktikat mira.
Në këtë aktivitet trajnues morën pjesë gjyqtarë, prokurorë dhe ndihmës ligjorë të Republikës së Shqipërisë.